odrahn

wos der mau sogd über dfrau des ged mi scho so au jedes wort des er sogd kaunst in mistküwi haun

er dirigiert und diktiert und er paternalisiert i hob scho so a wut auf den deppadn dude

er kumt auf olles mögliche er redt und redt und redt dass er amoi sei pappm hoit auf des kumt er ned

die oide maunaenergie is laut und fett und breit und wird jetzt endlich odrahd is e scho hechste zeit

umdrahn

die maunaenergie is destruktiv und dumm drum drahma die verhältnisse jetzt endlich amoi um

und mauna die verdienan nur mehr hoib so vü wie fraun deafn nimma wähln geh und a ned autofoan

ka internet für mauna ka mau im parlament ka mau is mehr zum seng bei irgendan event

auf bühnen nur mehr fraun nur mehr fraun im te vau es gibt jo wirklich niemand mehr der mauna auschaun kau

umasunst

biacha haumma glesn füme haumma gschaut olle nur vo mauna gmocht olle daunighaut

musi haumma aughoacht uns einizong die kunst olles nur vo mauna olles umasunst

mia woan in so vü länder und haum des ned kapiert regian dan fost nur mauna wean olle oserviert

mia woan in hundert firmen in gschäftln auf da gossn die schefs woan fost nur mauna olle wean entlossn

oiwei des söbe

und die frau die hod gmocht und hod gsogd und hod dau und direkt nebm ihr is er gschtaundn da mau

und die frau die hod gsogd wos schausdn so bled und da mau hod bled gschaud owa gredt hod er ned

und wia er wos gsogd hod des wüst goa ned hean woa oiwei des söbe und des woa zum rean

die frau die hod weidadau duad oiwei nu weida und da mau wos er sogd wird nu oiwei ned gscheida

gewoit

seit hunderttausend joa scho seit der zeit im woid mochn si die mauna wichtig olles mit gewoit

die fraun de mochn des und des sie dan wos eana gfoid die mauna song des passt ma ned olles mit gewoit de frau die duad sie kümmern olles unbezoid der mau der fint des super olles mit gewoit

er schaut dass er des ungerechte aufrecht erhoit für des hengt er sie eini olles mit gewoit

kindergärtner

des ungerechte is die schlechte geschlechterstruktur die mauna gockln umanaund und olle schaun zua

dass si des zügig ändert und des scho möglichst boid für des miassma wos mochn wei sunst weama ned oid

gewoit is primitiv is deppad und stupid gewoit muas endlich weg wie jeder femizid

a mau ois kindergärtner is des wos olle gfoid des kau jo ned so schwierig sei gauns ohne gewoit

oghaut

er hod gmaand er is a liawa hod a aungenehmes gmiad dawei nervt er nur olle hods bis heite ned kapiad

und er is aggressiv woan er hod sie scho fost ghaut und sie sie is oghaut und er hod bled gschaut

die mauna de haum glaubt sie haum olles richtig gmocht haum auzahd ois wie und jetzt is olles hi

die luft und da bodn und die temperatur und es kumt ma so vor sie haum nu immer ned gnua

internationale

die fraun haum si versaumid olle woan dabei schluss mit da vaoaschung des is jetzt ois vorbei

wos wüst mit deim matschismus mentalprimitiver des wü neamd mehr kapiastas brutalnormativer

zaschdöaz die männerbünde mitsaumt die kapitale feministisch is sie jetzt die internationale

die hülln kaust zerknüllen in denen wir nu steckn die frauen üwanehman die mauna höffm mit

(Markus Binder, 14.1.2024)