(Abend des 31. Dezember 2023. Auf der Straße vor dem Strandbad in Klagenfurt zwei ehemalige Beachvolleyball-Nachwuchsspieler in Zivilkleidung. Sie haben ihren Dienst als Security-Bedienstete beendet und sind dabei, sich voneinander zu verabschieden.)
DER ERSTE: Olso donn. Im –
DER ZWEITE: Immanuel haß i.
DER ERSTE: Eh. Waß i jo.
DER ZWEITE: Oba wolltest sogn, Imme, gib’s zua.
DER ERSTE: Naa, i wollt –
DER ZWEITE: Geht ma so aufn Sock, Imme, vastehst? I haß Immanuel, und nit ondas. Hot sich jo wos gedocht mei Vota, wia a mi hot Immanuel g’haßn noch’n Kant. Oda manst, hom se zu den aa g’sogt, Imme? Imme Kant? Ha? Ha?
DER ERSTE: Naa, natialich nit, oba i –
DER ZWEITE: Die Burgi aa. Konn i hundatmol sogn, nutzt nix. Die gonze Zeit, Imme, mei Imme, mei Immele. Is jo liab g’mant, oba geht ma so aufn Sock.
DER ERSTE: Huach zua. I wollt sogn: Im neien Joa olles Guate, Immanuel. Des wollt i sogn. Oba du host ma jo glei es Woat obg’schnittn.
DER ZWEITE: A so. Tuat ma lad. In der Beziehung bin i oft amol iwaempfindlich, waß i eh. Woa bled von mia. (Breitet die Arme aus.) Kumm hea. I winsch da aa olles Guate.
(Sie umarmen einander längere Zeit schweigend, dann:)
DER ERSTE: I donk da, Imme. Ealich, i donk da. Fia olles.
DER ZWEITE: Immanuel haß i.
(Vorhang)
(Antonio Fian, 29.12.2023)